" تاسە "

خۆشەویستم
زۆر لەمێژە تاسەی دووریت وەک دڵۆپێ فرمێسک لەناو گلێنەی چاوما قەتیس ماوە
هەوری ئازار بەسەر کێڵگەی تینووی دڵما پرچی رەشی خەم و زووخاوی هەڵاوە
خۆشەویستم
تاسەی دووریت بوو بە تفەنگ
دەستی لەمل چیا کرد و نەهاتەوە
تاسەی دووریت بوو بە خەیاڵ
رۆیی دەرگای سنوورەکان بکاتەوە
تاسەی دووریت بوو بە هەللاج
سێدارەی کرد بە جێژوانی دڵداری و ماچ
خۆشەویستم
لە نێوانی من و تۆدا دەریای ئاور شەپۆل ئەدا
سنوور وەک سەگ ئەلوورێنێ قەپ بە پاژنەی قاچا ئەکا
هەنگاو بە هەنگاو تێمانە
بەڵام من ئەو ئەویندارەم لە ناو خوێنا ئەژیمەوە
شەقڵی سنووریان ئەشکێنم بە حەیران سیاچەمانە
خۆشەویستم
باسی دڵداری من و تۆ دنیای گرت و هێشتا ئێمە لەیەک دوورین
باسی دڵداری من و تۆ چاوی مێژووی کردە کانی فرمێسک و خوێن
هێشتا ئێمە سەدە و ساڵ و مانگ ئەژمێرین
خۆشەویستم
تۆ رێکەوە من هەوڵ ئەدەم با بە یەکتر بگەینەوە
تۆ بانگم کە من پڕبەدەم هاوار ئەکەم
وەڵام یەکتر بدەینەوە
قەف قەف زەنجیر سنوورەکان بپچڕین و ئەو هێلانە شێواوەمان بکەینەوە بە کوردستان
ئەو هێلانە شێواوەمان بکەینەوە بە نیشتیمان

« جەلال مەلەكشا »
 

0 کۆمێنت

دۆستی هێژا کۆمێنتێک بنووسە!